Cebu City – Mitambong si Gob. Gwendolyn Garcia sa Senate’s “hybrid public hearing” karong adlawa nga nagtuki sa isyu kalabot sa government response sa COVID-19 pandemic.
Base sa iyang text message sa mga reporter, si Garcia mitug-an nga nakadawat siyag imbitasyon ni Senate President Vicente “Tito” Sotto III sa maong hearing.
Suma pa ni Garcia, virtual ra man ug wala kinahanglan nga moadto siya sa kaulohan.
Gani, gipanghatagan pa ni Garcia og kopya sa invitation letter nga gi-address kaniya ang mga sakop sa media.
Giingon nga ang upper chamber sa Kongreso magtagbo og balik sa Martes aron ipadayon ang pagtuki sa mga isyu nga may labot sa National COVID-19 Vaccination Program.
Matod pa ni Sotto, tukion sa Senado ang utilization sa budgetary provisions sa National COVID-19 Vaccination Program ug ang posibleng pag-usab sa quarantine guidelines sa IATF o Inter-Agency Task Force para pagpahapsay sa proseso.
Lakip na nga hisgutan ang paghashas sa existing protocols, ug sa posibleng exemption sa mga tawong kompleto na sa bakuna pag-apil sa mandatory travel quarantine. (Jhon Tadlip/JTY)
(News & photos courtesy of Cebu Provincial Government)