Nakit-ang namatay didto sa Brgy. 6, Poblacion, Dapa, Surigao del Norte ang 70 anyos nga German national nga nailhan pinaagi sa iyang dala nga pasaporte ug uban pang mga dokumento nga mao si MR. WYRWIAK THOMAS, niadtong Martes, Mayo 19.
Mga alas 12:00 sa udto dihang nadawat sa personahe sa Dapa Municipal Police Station ang tawag sa usa ka concerned citizen nga mao si Mr. July Sumaylo, 44 anyos, balo, self-employed, ug lumulupyo sa nasampit nga lugar, nga nangayo ug dinaliang tabang human makit-e ang natumba nga lalake sa dalan sa municipal gymnasium tapad sa gisakyan niining bisekleta.
Gidala ang maong German national didto sa Siargao District Hospital pinaagi sa joint personnel sa Rural Health Unit sa Dapa ug sa mga responding police officers, apan gideklara na kining dead on arrival pinaagi na ni Dr. Elizabeth L. Gio, ang duty Physician.
Nasayran sa gihimong inisyal nga imbestigasyon nga si Mr. Thomas ang miadto sa Office of the Municipal Tourism aron sa pagpangayo ug assistance alang sa iyang pag-uli diin gitagad siya ni Mr. Irvin Bendanillo, ang Tourism Officer – Designate.
Sumala ni Mr. Bendanillo nga human niya makuntak ang Bureau of Immigration ug ang uban pang mga buhatan alang sa pagbyahe ni Mr. Thomas, ang iya kining giabisohan nga muadto sa buhatan sa Barangay 6, Poblacion aron sa pagkuha ug Barangay Certificate, ug mibiya kini mga alas 11:35 sa buntag sa samang adlawa/petsaha sakay sa iyang bisekleta.
Gibutyag ni Mrs. Cherla Escauso Vasquez, ang incumbent Barangay Captain sa Barangay 6, Poblacion, nga kaniadto kanunay niyang makaestorya si Mr. Thomas ug sa ilang mga panag estoryahay, nahisgutan sa maong German national ang iyang problema sa kasingkasing ug kini nag-inom na ug maintenance nga tambal.
Mipadala na ug request for autopsy ang Dapa MPS sa PNP Crime Laboratory Office, ning dakbayan alang sa pagtino sa hinungdan sa kamatayon sa langyaw, ug gikuntak na usab sa hepe sa maong kapulisan ang Foreign Liaison Division alang sa ilang kasayuran ug tukma nga disposasyon. (Jun Prex Salubre, Ronda 6 RPN DXKS)
Â