Subling nagpahinumdom si General Santos City Mayor Ronnel Rivera nga pabiling ipatuman sa siyudad ang “no movement Sunday”, nightly curfew ug liquor ban sa tibuok bulan sa Hulyo.
Sa usa ka pamahayag, giasoy sa amahan sa siyudad nga gumikan sa gipalawig pa sa National-IATF ang general community quarantine classification sa GenSan, wala’y mamahimong kabag-uhan sa gipatumang mga health measures, ilawom sa kasamtangan niining executive orders.
Una nang giangkon sa mayor nga nagpabiling dakong hagit sa city government ang pagtapna sa pagkaylap sa virus og ang pagsaka sa ihap sa mga natakbuyan niining residente.
Samtang, nadugangan pa og 80 ka residente sa GenSan ang nagpositibo sa coronavirus disease 2019 infections.
Sa bagong datus sa Department of Health, miambak na sa 5,739 ang citywide tally, diin, 688 sa mga niini ang aktibong pasyente.
Gikumpirma usab sa DOH ang 4,873 nga total recoveries, lakip na ang 60 nga new survivors.
Gikataho usab sa ahensiya ang laing natala nga Covid-19 related death. Anaa na sa 178 ang ihap sa nakabsan sa kinabuhi gumikan sa pandemiya sa siyudad. (John Rey Somido)