Polomolok, South Cotabato – Misangko sa pagpamusil-patay ang pagsang-at sa warrant of arrest sa mga awtoridad batok sa usa ka Most Wanted Person sa Purok 4 Amgoo, Brgy Landan, Polomolok, South Cotabato niadtong Oktubre 22, 2023.
Giila ang namatay nga suspek nga si alyas “Roberto”, kinsa giilang Top 9 Regional Most Wanted Person alang sa kasong Murder, Frustrated Murder ug Arson.
Ang operasyon gihimo ubos sa pagpangulo sa Regional Intelligence Division 12 sa pakigtambayayong sa Polomolok MPS personnel; Regional Intelligence Unit 12; South Cotabato Provincial Intelligence Unit; 1st and 2nd South Cotabato Provincial Mobile Force Company; PNP SAF ug 5th Special Forces Battalion.
Sa report sa mga otoridad, dihang nabatyagan sa suspek ang pag-abot sa mga operatiba aron i-serve ang warrant of arrest, gilayong nakigpinusilay ang suspek hinungdan nga nibawos ang mga otoridad, diin nakaangkon og samad pinusilan ang suspek nga maoy hinungdan sa iyang kamatayon.
Samtang, gidayeg ni PBGen Jimili L Macaraeg, Regional Director, PRO 12 ang naglihok nga tropa sa ilang malampusong operasyon.
Dugang pa niya nga ang PRO 12 magpadayon sa pagpakusog sa ilang manhunt operations ug anti-criminality campaign aron masiguro nga luwas ang kadalanan ug komunidad alang sa tanan. (Rey Ombana)