GENERAL SANTOS CITY – Natapos na alas dose kagabii ang campaign period nga gisugdan kaniadtong Oktobre 21 nga gitagana sa Commission on Elections alang sa Barangay ug SK Elections. Busa niining adlaw bawal na sa mga kandidato ang pagpangampanya lakip gibawal ang pagsul-ob ug mga sapot nga nakabutang ang pangalan sa mga kandidato segun sa Commission on Elections.
Niining adlawa usab meepekto na ang gipatuman nga liquor ban pinasibu sa COMELEC Resolution No. 10902 hugot nga nagbawal sa pagbaligya ug bino, ug mga makahubog nga ilimnon hangtud Oktobre 30 isip kabahin sa pagpangandam sa pinili-ay nga ipahigayon ugmang adlawa.
Temporaryo nga gipahunong ang unsa mang matang sa pagbaligya, pagtanyag, paghatag u pagpa-inum sa mga makahubog nga ilimnon sa besperas ug sa mismong adlaw sa pinili-ay. Una ng gibutyag ni Atty Jose Villanueva Assistant Regional Director sa COMELEC 12 nga lakip gibawalan ang mga hotel, resort, restaurant ug mga establisemento sa pagdalit ug makahubog nga ilimnon gawas na lamang kung ang mupalit ug muinum ang dili Filipino. Ang kapulisan, national Bureau of Investigation ug uban nga otoridad ang mamahimo nga mudakop sa kinsa mang musupak niini ang mapahamtangan ug silot pagkabilanggo (Rey Ombaña)