Maasim, Sarangani Province – Wala na’y kinabuhing napalgan, Pebrero 18, 2024 ang usa ka Mangunguling sa Sitio Tolacao, Barangay Kamanga, Maasim, Sarangani Province.
Ngadto kang PMAJ HERMAN JOVERO LUNA-Hepe sa Maasim PNP kagabii, gi-ila niini ang biktima nga si Michael Quequin, 32 anyos, ulitawo, residente sa Sitio Tampuan sa susamang Barangay.
Subay sa imbestigasyon sa kapulisan, nananghid matud pa ang biktima sa iyang pamilya niadtong Sabado nga manguling sa bukirong bahin sa Sitio Tolacao, apan gikatingala nga wala na kini makapauli ning nakalabay’ng gabii.
Apan, alas-12:20 sa udtong tutok kagahapong adlawa, napalgan na lamang kining patay sa kabagnotan nga bahin sa naasoy nga lugar nga aduay 2 ka samad sa liog niini.
Apan, sigun ni Maj. Luna nga dili pa nila ma-determina karon kung unsa nga samad ang naangkon niini, samad pinusilan ba o samad dinunggaban.
Hulaton na lamang matud pa nila ang resulta sa ipahigayong post mortem examination sa taga Municipal Health Office sa maong patay’ng lawas, aron masuta kung unsa ang 2 ka samad nga iyang naangkon. (Giovanni Pasco, photo courtesy of Maasim PNP)