Sarangani Province – Ang Naval Forces Eastern Mindanao (NFEM) pinaagi sa BRP Artemio Ricarte (PS37), ang naka-intercept sa de-motor nga sakayan sa palibot sa Lefa Point, Glan, Sarangani Province, Davao Occidental niadtong Nobyembre 27, 2023.
Ang BRP Artemio Ricarte (PS37), usa sa mga floating assets sa Philippine Navy ubos sa operational control sa Naval Task Force 71, nipahigayon og maritime patrol ubay sa kadagatan sa Glan, Sarangani Province, ug nakit-an ang walay suga nga motorized watercraft nga mitabok sa dagat.
Ang interdiction operation nahitabo sa dihang ang watercraft misulay sa paglikay sa PN vessel.
Atol sa pagpahigayon sa Visit, Board, Search, and Seizure (VBSS), nadiskubrehan nga ang maong salakyanan gikargahan og gibana-bana nga 50 ka kahon sa illegal nga miscellaneous cargo.
Sa dugang imbestigasyon nasayran nga aduna kini upat (4) ka tripulante nga sakay, duha (2) niini mga undocumented Indonesian nationals. Matud pa nga gikan sila sa Glan paingon sa Indonesia dala ang maong kargamento.
Kalabot niini, ang medical team sa unit nagpahigayon og eksaminasyon sa panglawas sa mga nadakpan nga crew nga nagpakita sa normal nga resulta. Ang maong mga tripulante ug mga sakayan sa tubig gihatud sa PS37 ngadto sa Dolephil Pier, Brgy Calumpang, General Santos City alang sa tukmang turnover ngadto sa mga awtoridad. (Rey Ombana, photo courtesy of NFEM)