General Santos City – Giila na sa iyang mga kabanay ang patay’ng lawas sa usa ka babaye nga napalgang nagsugod na pagkadugta nga nakasulod sa usa ka dakung kolor blue nga fish cellophane ug gilabay sa kasagbotan nga bahin haduol sa usa ka sapa sa Reform Village, Brgy. Calumpang, General Santos City.
Giila ang biktima nga si Gina Guillaran, 38 anyos, adunay 4 ka anak, taga Pacman Village, Purok Quilantang, Brgy. Calumpang, sa susamang dakbayan.
Naila kini pinaagi sa iyang tattoo sa kilid ug tuo niining hawak, sa gisul-ob nga kupas nga maong short ug sa gisuot nga sandal.
Subay sa natuhog nga impormasyon, usa ka egg vendor o tiglibod og itlog ang biktima ug 4 ka adlaw na kining na-missing o nawala ug gipangita sa iyang bana ayha napalgan ang dugta ug baho na niyang lawas sa nasampit nga dapit pasado alas-4:00 ang takna kagahapon sa hapon, Agosto 18, 2024.
Unang nang gikanayon ni PMaj. Robert Fores- Hepe sa Police Station 10 nga posibleng sa balay gipatay ang biktima, gumikan adunay nakalakip nga bed sheet, habol ug floormat ang selopin nga gisudlan sa patay’ng lawas niini.
Pero, gusto karon sa pamilya sa biktima nga ipa-ilalum sa awtosiya ang patay’ng lawas niini aron masuta kung gi-unsa kini ug unsa gayud ang gikamatyan niya? (Rem Agdon)