Samaran ug nabunol ang usa ka lalake human nibangga ang gimanehong motorsiklo sa katagbo nga sakyanan didto sa National Highway, Galas sakop ning syudad pasado alas 7 ang takna sa kagabhion, Pebrero 23, 2020.
Ang mga biktima giila nga sila si Kirk Tanara, 40 anyos, minyo ug lumulupyo sa nasangpit nga barangay ning syudad ug gamaneho sa puti nga Toyota Hilux ug si Harry Belarmino, 35 anyos, olitawo ug lumulupyo sa barangay Manawan, Jose Dalman ug gamaneho sa itom nga Honda Beat.
Sumala pa sa inisyal nga imbestigasyon sa kapulisan, samtang gibaybay ni Tanara ang National Highway ug aksidente kining gibanggaan ni Belarmino nga nagagikan sa Galas Elementary School. Gituohan nga anaa sa ilalom sa gahom sa ilimnong makahubog  si Belarmino nga niresulta sa maong aksidente.
Guba ang atubangang bahin sa duha ka sakyanan, ug nakaangkon si Belarmino ug samad ug bun-og sa nagkalain-laing parte sa iyang kalawasan ug karon anaa nagpaalim sa Corazon C. Aquino Hospital .
Anaa karon sa kustodiya sa Dipolog City Police Station ang motorsiklo nga gimaneho ni Belarmino alang sa pormal nga pagpasaka ug kaso batok kaniya.