Nagmalampuson ang gipahigayon nga Fair Trade Laws kon FTL Monitoring ug Enforcement ngadto sa nagkalain-laing mga tindahan dinhi sa dakbayan kaniadtong Marso 09, adlaw’ng Martes, ning tuiga nga nagsugod sa may alas-8:30 sa kabuntagon. Ang maong kalihokan ang gipangunahan sa Department of Trade and Industry (DTI) Regional Office IX inubanan sa Department of Trade and Industry Provincial Office dinhi sa Zamboanga del Norte.
Ang mga nanguna sa nasangpit nga kalihokan gikan sa DTI Regional Office IX mao sila si CTIDS, Mr. Samuel Delos Reyes, kinsa mao’y “team leader” sa gipahigayong monitoring ug enforcement, uban sa mga Trade-Industry Development Analysts (TIDAs) nga sila si Ms. Jonna Louh David ug Mr. Kevin Ross P. Tampioc.
Lakip usab sa nanguna sa maong kalihokan sila si Senior Trade-Industry Development Specialist Mr. Victor B. Manigsaca, Trade-Industry Development Specialist, Ms. Maila J. Dinolan ug CPD – Aide, April Rose D. Castillon gikan sa DTI Provincial Office dinhi sa Zamboanga del Norte.
Nasayran nga mikabat sa dise nuwebe (19) ka mga tindahan dinhi sa dakbayan ang nasusi sa nasangpit nga buhatan lakip na ang Isaias Top Marketing Corp., M&S Amigo Marketing Entrepreneur Corp., Lee Plaza City Central ug Savemore – Sanford Marketing Corp. Nasayran usab nga usa sa mga ginasusi sa maong buhatan mao ang “product standards” sa mga palaliton, “price tag”, “business name” niini ug uban pang importanteng mga dokumento nga gikinahanglan aron lihitimong makapadagan ang maong tindahan.
Tumong sa maong gipahigayon nga kalihokan ang maseguro ang kaluwasan sa mga konsyumer kung mopalit og mga produkto ug suplay gikan sa tindahan pinauyon sa mga lagda ug gabayan nga gilatid sa RA 7394 kon Consumer Act of the Philippines of 1991. (City Information Office-jnp)