Human sa upat (4) ka adlaw nga lockdown gikan September 2, 2020 , pormal nga giablihan kagahapong adlawa ang Gensan fishport market 1, 2 and 3 ( adlawng domingo ) alang sa tanang mga trabahante ug mga negosyanteng kumprador ug isda apan sa hugot nga health protocol gipatuman sa LGU-IATF, PFDA ug SFFAI kon SocSarGen Federation of Fishing and Allied services .
Kini human sa gipatuman nga lockdown tungod sa daghang nagpositibo sa Covid 19 nga gituohang diha sa fishport maoy common denominator kon epicenter sa pagkuyanap sa Covid 19 virus gitawag nga local transmission.
Sumala sa kumpirmasyon sa Department of Health (DOH XII) ug local IATF sa pagpanguna ni Gensan City Mayor Ronnel Rivera nga aduna nay local transmission sa Covid 19 dinhi sa syudad sa Gensan hinungdan nga gipatuman ang border lockdown ug clustering sa mga barangay kalakip ang mga zonal lockdown sa nagkadaiyang mga barangay ug lockdown sa adlawng Domingo .
Mitala na ug lima (5) ang patay sa Covid 19 dinhi sa syudad sa Gensan ug gipahigayon karon ang massive contact tracing sa nagkadaiyang mga barangay susama sa Tambler , Apopong , Bula, Conel , Mabuhay, Dadiangas West, Katangawan , Lagao ug uban pa . Mikabat na sa 128 positive cases sa Gensan Covid 19 , 74 active cases ug 5 patay samtang 49 pa lamang ang naka recover .
Kaganinang sayo sa buntag , nagpunsisok ang mga tawo ug mga sakyanan pasulod sa entrance samtang ang tanang mosulod ang gikinahanglang mag face mask, face shields, medical certificate , white long sleeves , thermal gun kon walay lagnat ug pagpahigayon ug social distancing samtang anaa sa sulod sa Gensan Fishport .
(Roniel Degorio RPN DXDX Gensan)