Cebu City – Kinahanglan na nga moagi sa real time-polymerase chain reaction (RT-PCR test) o sa rapid antigen test ang mga biyahedor sa Bohol, Negros Oriental, ug Negros Occidental nga moanhi sa Sugbo.
Kini ang unod sa Executive Order no. 24 nga giisyo ni Gob. Gwendolyn Garcia nga naglatid sa dugang requirements sa mga biyahedor gikan sa naasoyng mga probinsya diin giingong nagsaka nga mga kaso sa coronavirus disease o covid 19.
Ipatuman ang naasoyng sumbanan sugod sa alas 12:01 ganinang kaadlawon hangtod sa Hulyo 14.
Sa iyang EO, si Garcia miingong nga base sa record sa Department of Health, nagsaka ang mga kaso sa covid 19 sa Bohol ug Negros island.
Hangtod niadtong Hunyo 10, nakatala ang Bohol og 1,095 ka aktibong kaso samtang sa Negros Oriental 2,528.
Una niini, nagtagbo ang Department of Health o DOH-7, Department of the Interior and Local Government o DILG-7, usa ka representante sa OPAV o Office of the Presidential Assistant for the Visayas, ug kagamhanang probinsiyal ug ilang nasabotan nga pahugtan ang restrictions sa tanang tawo sa maong mga lalawigan nga mosud sa Sugbo. (Jhon Tadlip/JTY)
(News & photos courtesy of Cebu Provincial Government)