33.8 C
Manila
Friday, March 29, 2024

Duha Ka Surigaonon Nakabagat Nan Kuarta Kantidad 62 Mil Ka Pesos Tag Turn Over Kan Vice Mayor Nitoy Matugas

- Advertisement -

Jadton adlaw na Sabado, Mayo 9, 2020, duha ka tawo , mga Surigaonon, sila si DIONESIO C. ARIATE, nagtrabaho sa Surigao Cable TV sanan ALBERTO ANGOB, JR., tricycle driver, an swerte na nakabagat nan isa ka sobre na puti pinilo, sanan baga baga, na sa ila pag tan-aw kuarta. Pero waya pa anay nila ini ukara, lamang kay an porma nan sobre sanan ila man masilib ini, na sa ila una na tantiya mokabat dili moubos nan 40mil pesos.

Sa ila pagsabot duha, nadesisyonan nila na i-entrigar sa Mayor sa City Hall an napuyutan na kuarta, pero nakadumdum ra sila na Sabado ugsa nakadesider sila na sa bayay ra kan nan Mayor i-kadto. Pero waya nila hiabti si Mayor Estong Matugas, inay an amahan nan ini na si Vice Mayor Nitoy Matugas an ila naatubang. Tagdaya sila ni VM Matugas sa ija opisina ug didto pormal na tagdawat an tag entrigar na kuarta iban sa pipila ka mga testigo. Sa pagkwenta sa kuarta na suyod sa sobre nuabot ini nan 62 mil ka pesos sa tagsa ka libo na uyad.

Nagpasalamat nan dako si VM Matugas ug nakadajeg ini sa katarong nan duha na bisan sa inin panahon nan kalisod tungod sa COVID-19 nakahunahuna pa an mga ini sa pag-uli sa nabagtan na kuarta. Agig pasalamat tagduhoyan inin duha nan pahalipay ni VM Matugas na gamay na cash sanan tag duha na food packs.

Igo ra mataud taud, isa ka negosyante, kanhi kapitan kuman kagawad sa Barangay Ipil, Tomas Delani an nakigkita kan VM Matugas ug tagclaim an nabagtan na kuarta. Laong ni kanhi kap Delani na isa nija ka pag umangkon an nakakita sa facebook sa pag turn over nan mga nakabagat ngadto kan Vice Mayor.

Gumikan sa ilang kabuotan, nakigsabot si Delani na makigkita sa duha aron isab idja hatagan nan pahalipay sa ilang pag-uli sa daku na kantidad. (Jhino Parrucho | Ronda 10 | RPN DXKS)

Note: IF YOU READ TRANSLATION, THAT IS A FALSE TRANSLATION BY FACEBOOK THAT USES WRONG GRAMMAR AND NO VOCABULARY OF SURIGAONON LANGUAGE, PLS. CLICK NEVER TRANSLATE AND READ THE ORIGINAL. Thank you.

 

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -