Patay ang duha ka mga kanhi polis sa dihang gipusil kini sa usa ka lalaki kagahapon mga alas 6 pasado sa sayong gabii duol sa usa ka mall sa Barangay Bulacao, Talisay City, Cebu. Giila sa kapolisan ang mga biktima nga sila si retired SPO1 Edgar Causon ug retired SPO4 Ferdinand “Dindo” Navalez pulos nagpanuigon og 54 anyos.
Matud sa pasiunang pakisusi sa mga kapolisan, ang mga biktima nagsakay sa usa ka motorsiklo dili layo sa usa ka mall sa Barangay Bulacao sa nahisgutang syudad sa dihang gipusil kini sa makadaghang higayon sa nagbinugtong nga suspetsado.
Nahiagom sa mga samad agi sa pinusilan sa ulo ug sa nagkalain-laing bahin sa kalawasan ang mga biktima. Si Nuevo Causon, 26 anyos anak sa gipatay nga kanhi polis nagkanayon nga wala gyod siya’y kasayuran kon nganong gipatay ang iyang amahan. Matud niya nga maayong tawo ang iyang amahan. Si Causon miretiro sa katungdanan sa nakalabay’ng tuig ug katapusan siya nga nadestino sa Cebu City Police Office (CCPO). Samtang ang laing gipatay nga polis nga si Navalez katapusang nadestino sa Cebu Provincial Police Office (CPPO) sa wala pa kini moretiro sa serbisyo.
Sa pikas bahin, usa ka jail guard ang gipatay kagahapon sa kaadlawon sa mga tawo nga nagsakay og motorsiklo. Ang gipatay sa riding in tandem giila nga si Prison Guard 1 Jessie Castanares, 33 anyos ug jail guard sa Cebu Provincial Detention and Rehabilitation Center (CPDRC). Siya maoy ika-tulo nga CPDRC jail guard nga gipatay sulod niining tuiga. Napalgan ang nagbuy-od nga lawas ni Castanares dapit sa eskina sa Lim Kakeng ug Happy Valley Streets, Barangay Guadalupe, Cebu City.
Sumala pa sa mga saksi nga kalit nga mibutho ang riding in tandem sa luyo ni Castanares ug mipusil kini sa biktima sa makadaghang higayon. Laing saksi sa pagpamusil mihulagway sa mga suspetsado nga pulos kini mga lalaki ug nagsul-ob sa dark jackets ug nagsakay sa usa ka blue scooter.
Gibutyag ni CPDRC Warden Reynaldo Valmoria nga kanunay’ng motumaw ang pangalan ni Castanares gumikan sa giingong kalambigitan sa mga irregularities.
Ang nahitabong pagpatay kang Castanares maoy ika-pito nga high-profile killing sa nakalabay’ng upat ka adlaw nga naglambigit sa negosyo sa illegal drugs.
Gibutyag ni Valmoria nga ang illegal drugs maoy posible nga motibo sa pagpatay kang Castanares. Gipasabot ni Valmoria nga aduna’y koneksyon ang pagpatay ni Castanares sa usa ka high-profile CPDRC inmate nga si Jerryfer Peregrino kinsa nabilanggo tungod sa kasong illegal drugs ug gipatay uban sa duha ka jail guards nga sila si Bernie Bayutas ug Joel Tevez niadtong Septiyembre sa nakalabay’ng tuig.
Midugang si Valmoria nga si Castanares gisuspenso sulod sa duha ka buwan niadtong buwan sa Pebrero karong tuiga uban kang Tevez ug sa laing napulo ka mga jail guards gumikan sa mga illegal activities. Matud ni Valmoria gipangsuspenso ang nahisgutang mga jail guards tungod sa kalambigitan sa pagkuyanap sa illegal drugs ug usab pagpayuhot sa mga kontrabando sulod sa CPDRC.