Cebu City-Gihatud na sa katapusang kapahulayan ang lawas ni Senador Jhon Henry Osmena (JHO) nga gi cremate, pinaagi sa usa ka private ceremony tinambongan sa iyang pamilya, iyang suud nga mga higala ug mga staff didto sa Skyline Columbary sa Barangay Busay, Syudad sa Sugbo, pasado alas 4 kagahapon sa hapon, Pebrero 3, 2021.
Matod sa iyang igsoon Annie Osmena-Aboitiz nga si Fr. John Jonah A. Orat maoy mipahigayon sa funeral mass.
Lakip sa mga mihatud ang igsoon sa senador nga si kanhi Governor Lito Osmena, mga pag-umangkon ug mga staff sa Syudad sa Sugbo ug Toledo.
“We asked his friends and supporters, please omit flowers and just offer masses or mass cards,” pahibaw ni Aboitiz
Milanat lang ug dul-an sa usa ka oras ang ceremony kagahapon.
Gipahibaw sab ni Aboitiz nga gitakdang mo-abot ang anak ni JHO nga si Jhon Gregory Osmena sa labing daling panahon.
Ang duha ka chamber sa Congress mi issue na ug resolution paghatag ug pasidungog sa natampo ni Osmena sa nasud isip Senador ug Kongresista.
Naka half-mast karon ang bandila sa upper ug lower house lakip na ang sa Cebu City ug Toledo.
Si JHO naka serbisyo kaniadto isip konsehal ug Bise Mayor sa Syudad sa Sugbo ug napopos ang iyang political stint isip Mayor sa duha ka termino sa Toledo. l via Jhon Tadlip
Source: Community Affairs Office-Toledo City via Ferliza Contratista Calizar
Photo:Toledo City Public Information Office