Duha (2) ka indibidwal ang nagpabilin ning panahuna sa Provincial COVID Isolation Center sa probinsya sa Sarangani, ug kana mao ang nag-positibo nga OFW taga-Maasim ug ang Glan LSI/locally stranded individual. Una ng nag-negatibo sa mga swab test ang OFW taga-Alabel.
Kadtong LSI taga-Malapatan ug ang Maitum LSI ang wala na dal-a sa provincial isolation facility, anaa sila sa mga municipal isolation center nagpaabot sa dungag nga swab test tungod wala kini sintomas. Naghulat na lang usab ang Glan LSI sa bag-ong resulta. Ang Maasim OFW ang nagpabilin nga anaa sa stable nga kondisyon.
Adunay nadungag nga nag-positibo, usa ka lalaking OFW taga-Kiamba, trayntay-uno (31) anyos. Wala kini sintomas maong anaa kini karon sa Kiamba municipal isolation facility. Walay nakaduol kaniya nga myembro sa pamilya sa iyang pag-quarantine.
Samtang, sa natigayon nga meeting atong adlaw nga Martes sulod sa municipal hall sa Maasim alayon sa nag-positibo nga OFW taga-Sityo Barrio Site, Maasim, nasabutan nila Governor Steve Chiongbian Solon, Mayor Zyrex Pacquiao, taga-health department, kapulisan ug kasundaluhan, nga usahon ang municipal quarantine center aron tingub ang pag-monitor sa mga LSI ug OFW. Susama sa ubang mga lungsod sa Sarangani Province, makanunayon nga ginabantayan sa pagpanguna sa taga-munisipyo katugbang ang kapulisan ang quarantine facility aron mapugngan ang paggawas-gawas sa mga naka-kwarantina ug hugot mapatuman ang quarantine protocol, pagsul-ot og face mask, physical distancing ug ang pagdili sa panagtapok sa tao.
Natapos na ang swab testing ngadto sa adunay direct contact sa Maasim OFW pinaagi sa pagtinabangay sa taga-Department of Health, Sarangani Provincial Health Office ug Maasim Municipal Health Office. Resulta na lang karon ang gipaabot gibana-banaan nga mugawas kini human sa tulo (3) ka adlaw. Naglaum ang taga-Barrio Site, Maasim nga mag-negatibo ang tanang resulta aron matanggal na ang gipatuman karon sa ilang sityo nga ECQ kon Enhanced Community Quarantine.