Cebu City – Gihangyo karon sa dental community ngadto sa mga pasyente nila nga magmatinud-anon sa ilang bag-ong exposure ug medical history sa higayon nga mo bisita kini sa mga dentista.
Giisip nga ang mga dentist maoy usa sa mga nag atubang sa labing risgo nga mataptan ug Covid-19 gikan sa mga pasyente.
Usa ka lokal nga dental clinic sa Poblacion, Lapu-Lapu misubay sa striktong misubay sa protocol ubos sa new normal.
Si Dr. Jojie Igot-Galudo sa Igot-Galudo Dental Clinic personal nga mipatuman niini sa matag kliente sa maong clinic, diin dunay duha ka pahina nga questionnaire ang tubagon sa pasyente labot sa iyang recent exposure ug medical history.
Matod ni Dr. Igot-Galudo medyo kuti ang proseso pero kinahanglan motoman niini alang sa luwas ug siguro nga pag-atiman.
Dugang pa niini ang kamahal sa mga ekipo nga ibutang aron maka abli ug balik ubos sa new normal.
Gibutyag sa maong doktor nga mogasto sila ug dugang dul-an sa 75 mil ka pesos alang sa pagpalit ug pagbutang ug air purifier ug suction machine sa ilang clinic.
Basi kini sa rekisitos nga gipatuman sa Philippine Dental Association kon PDA.
Hangtud karon dunay pipila pa ka mga dental clinic nga wala pa mo bukas gumikan kay dili pa kini andam ubos sa new normal nga pagpadagan. (Jhon Tadlip)
(Source: Interview with Dr. Jojie Igot-Galudo)