‘Duck Layer Production’ Sustenable Ug Alternatibong Proyekto Sa ProVet Sa Mga Apektado Sa ASF

Niining nagpadayon ang hulga sa African Swine Fever (ASF) sa lalawigan nangita pa og laing mga pamaagi ug alternatibo ang kagamhanan sa Misamis Oriental ubos ni Governor Bambi Emano nga matabangan ang mga mag-uuma o hog raisers.

Si Provincial Veterinary Office Head Dr. Benjamin Resma, atol sa virtual nga pagpakayab sa nasudnong bandila sa Kapitolyo Probinsyal nagpaabot ug nireport kalabot sa ilang gihingusgan nga alternatibong panginabuhian aron makabangon ang mga naapektuhan sa African Swine Fever ug kini gitawag nga “Support to ASF Affected Farmers Livelihood Project” nga mao ang “Duck Layer Production”.

Gibutyag ni Dr. Resma nga dili malalis ang giya ug suporta ni Governor Bambi sa mga Misamisnons sama sa mga mag-uuma nga naapektuhan sa ASF ug gimando niini nga kinahanglan nga sustainable ang maong proyekto.

Kini aron makatabang sa ilang pang-adlaw nga panginahanglan hilabina wala pa gyud kini sila gitugotan nga makapadako og baboy tungod kay dili ingon kadali nga mawala ang virus sa palibot.

Lakip sa gilantaw sa Duck Layer Production aron madugangan ang kita sa mga mag-uuma, mapalambo ug mapauswag ang ilang panginabuhian, saktong produksyon sa pagkaon labina nga gikan sa Itik adunay itlog nga maoy hinguhaan og protina isip alternatibo sa nagkagamay nga suplay sa karne.

Sa maong proyekto ang mga Municipal Agriculturist ug ang Barangay Captain ang mopili sa mga mag-uuma ug ang PVO pinaagi sa Itik team ang mag-validate ug magkumpirma sa kwalipikasyon sa mga mag-uuma.

“Ang mga mag-uuma kinahanglan nga interesado sa pagpadako sa itik ug andam nga magtukod og balay sa itik, ang lugar kinahanglan adunay magamit nga mainom nga tubig ug mga lokal nga materyales alang sa balay sa itik sama sa mga kahoy o kawayan ug sundon ang mga protocol sa proyekto,” pasabot ni Dr. Resma.

Papel lamang sa PLGU mao ang pag-validate, paghatag og pahibalo sa proyekto, pagtudlo sa sakto nga house duck construction, paghimo og regular nga kahimtang sa pagmonitor sa proyekto ug programa sa pagtipig sa mga mag-uuma, pagpasilitar sa marketing pinaagi sa pagkolekta sa mga itlog gikan sa uma ngadto sa mga mamalitay niini.

Lakip sa ilang tahas mao ang pagpasilitar sab sa pagbayad sa pagpamaligya ug paghatud sa mga feeds ug pagpalambo sa produkto labina daghang kahimoan nga makuha sa itik ug itlog niini. (Geo Denque, PIO)