Gipamahayag ni Regional Director Cezario Joel Espejo nga nagpaabot na lang sila karon sa abiso sa nasyonal nga gobyerno apan may puruhan matud pa nga makadawat kadtong mga kwalipikado nga wala matagai sa unang pagpanghatag sa SAP kon social amelioration program emergency cash subsidy program nga tag-Singko Mil ka pesos (P5K) kada beneficiary family/household.
Sa pakighinabi sa mga media kang RD Espejo, gibutyag sa opisyal nga nagpaabot na lang kini sa direktiba kung may ikaduha pang SAP distribution sa mga GCQ kon general community quarantine area sama sa Rehiyon Dose human unang gikataho nga ang mudawat sa ikaduhang SAP payout ang mga lugar na lang nga napailalum sa ECQ kon enhanced community quarantine.
Apan gipamulong niini nga may puruhan nga makadawat kadtong wala matagai sa pirmerong pagpanghatag kadtong gitawag nga mga “left out” o “waitlisted families.” Una ng gi-anunsyo ni Pangulong Rodrigo Duterte nga buot niining matagaan ang tanang panimalay sa SAP kadtong labing naapektuhan ang panginabuhian ug pagpuyo tungod sa Coronavirus pandemic.
Gidayig na lamang ni Director Espejo ang probinsya sa Sarangani sa liderato ni Governor Steve Chiongbian Solon tungod pinakauna ang Sarangani sa tanang dapit sa Region 12 nga nakahuman sa pang-apud apod og SAP natuman ang national deadline nga gimando ni Presidente Duterte. Maayo matud pa ang pagdumala ug koordinasyon nila Governor Solon maong paspas kining nahatag sa katawhan.
Samtang, gikumpirma ni RD Espejo nga ang CIDG ug DILG na ang mu-kaso sa mga nakadawat og SAP nga dili angay mudawat o dili ba kaha nag-doble sa pagdawat. Pwede pang iuli matud pa ang kwarta aron dili maalaot sa musunod nga mga inadlaw. Ihatud lang sa treasurer’s office sa ilang mga lugar kung dili kini kwalipikado sa pagdawat aron dili makasuhan.