CAGAYAN DE ORO CITY – Giklaro ni Lt. Col Mardy Hortillosa ang spokesperson sa Police Regional Office sa Northern Mindanao nga dili nila buhat ang pagrecycle sa illegal nga druga nga ilang nasakmit gikan sa mga operasyon. Kini nga pamahayag iyang gisulti dugtong sa imbestigasyon karon sa senado sa 13 ka mga police officers nga giakusahan nga nagrecycle sa druga nga ilang nasakmit niadtong 2013 nga operasyon sa Pampanga.
Matud pa ni Hortillosa, wala pa hinouy nareport dinhi sa rehiyon 10 labot na sa drug recycling incidents. Sa ilang mga operasyon, kanunay sila manawag sa media nga mouban kanila aron transparent ang procedure sa ilang operasyon, pasabot pa ni Lt. Col Hortillosa.
Samtang sa pikas bahin, gitaho sa maong police official nga ilang nadakpan sa miaging semana ang high value drug personalities bitbit ang balor 350 mil pesos nga illegal drugs. Ang mga nadakpan mao sila si Manuel Dagooc, 37 anyos taga Igpit, Opol, Misamis Oriental ug Jennifer Quilab, 35 anyos nga taga Julio Pacana St., Barangay 25 ning syudad sa Cagayan de Oro.
Nasayran nga ang duha bag-ohay pa lamang nakagawas sa bilanggo. Si Dagooc nakagula niadtong Septembre ning tuinga samtang si Quilab niadtong Enero 2019. Apan karon, gibalik na usab sila balhog sa prisohan.