Davao City – Gitakda nga pasakahan ug kaso ang lima ka mga tawo nga nadakpan sa gipahigayong Drug Bust operation sa mga sakop sa Philippine Drug Enforcement Agency sa may Exodus, Fr. Selga Street, Barangay 8-A, Poblacion, Davao City, Lunes sa gabii.
Nadakpan sa operasyon ang target niini nga si Alvin Torrefiel, alyas Alvin, 32, residente sa lugar kinsa mibaligya og usa ka medium size nga pakite sa gituohang shabu ngadto sa asset sa PDEA, resulta sa iyang pagkasikop.
Atol sa operasyon, nadakpan usab ang laing upat ka mga tawo nga naa sa kuwarto kinsa giingong naghithit og shabu. Sumala sa PDEA-Davao, gihimong drug den ang balay ni Torrefiel ug daghan na kini og parokyano.
Dugang pa sa PDEA, dugay na nilang gipanid-an ang lihok ni Torrefiel butang nga mihimo na og operasyon ang otoridad sa pagpositibo nga mobaligya ang suspek ngadto kanila. Kasong pagsupak sa Republic Act 9165 kon Comprehensive Dangerous Drugs Act of 2002 ang ipasaka nga kaso batok sa mga dinakpan.