Nadawat na sa mga asosasyon sa kababaihan sa probinsya sa Sarangani ang dressmaking livelihood assistance nga ilang gipangayo sa DOLE kon Department of Labor and Employment agi sa Provincial Government sa Sarangani katambayayong ang mga municipal ug provincial PESO o public employment service office.
Segun ni Ms. Glenda Revaño, ang PESO manager sa probinsya, dakong kalipay matud pa sa mga benipisyaryo human nga ila ng nadawat ang mga makina sa panahi gipakapinan pa og mga tela nga silk ug uban pang materyales ug accessories magamit sa ilang panginabuhian sa dressmaking. Timing ang higayon nga nagpait ang kadaghanan tungod sa pandemya sa COVID-19.
Dili muubos P125,000 hangtud P400,000 ang kantidad sa mga kagamitan nga nadawat sa matag benipisyaryong kahugpungan. Palaran nga nakadawat ang grupo sa Bangsamoro Women Association sa Maitum, Kulturang Libon sa Malapatan ug Malabod Blaan Community sa Malungon.
Ang pondo ang kabahin sa P4.1 Milyon ka pesos nga nadawat ni Governor Steve Chiongbian Solon gikan sa DOLE sa liderato ni kanhing DOLE 12 Regional Director Sisinio Cano ug ni DOLE Sarangani Provincial Officer Domingo Baron, ilalum sa Kabuhayan Program kon DOLE Integrated Livelihood Program (DILP). Gitagaan og pagtugot si Governor Solon sa Sangguniang Panlalawigan nga pirmahan ang Memorandum of Agreement tali sa DOLE.
Una ng nakadawat sa mga livelihood starter kits ang gusto mag-negosyo og sari-sari store, bugasan, carenderia, cosmetology, Pisonet computer, magluto og mga kakanin, buko cream, kropek, bibingka, barbeque ug marinated bangsi, ug para usab sa mga gapamanday, mason, electrical installation, barber shop, welding shop ug gapamaligya og isda sa Sarangani Province.
(Provincial Information Office – Sarangani)