Tungod sa direktiba sa nasyonal nga gobyerno ni Pangulong Rodrigo Duterte nga dawaton ang mga LSI kon locally stranded individual ug mga ROF o Returning Overseas Filipino, gilauman na matud pa ang pagtala og mga kaso sa Coronavirus sa probinsya sa Sarangani susama usab sa nahitabo karon sa dakbayan sa Heneral Santos, South Cotabato ug uban pang lugar sa Rehiyon Dose.
Segun ni Dr. Arvin Alejandro, ang provincial health officer ug maoy ICS/incident command system commander, ang duha (2) ka nag-positibo sa COVID-19 sa Sarangani ang dili gikan sa sulod sa probinsya kundili gikan sa gawas. Maayo na lang nga anaa ra sila sa stable nga kondisyon.
Usa taga-Glan ang gideklarang positibo ug usa usab ang taga-Alabel. Gikan sa Cebu ang natanggong didto nga taga-Glan, baynte-kwatros (24) anyos nga lalaki. Dungan sila nga niabot sa taga-Gensan nga nag-positibo pud atong Mayo 31 sakay sa eroplano.
Ang taga-Alabel ang usa ka babaeng OFW nga gikan sa nasud Kuwait.
Nagpangidaron kini og baynte-otso (28) anyos, niabot gikan sa Maynila atong Hunyo 10, ug dungan sila nga nag-positibo sa kasakay nga taga-South Cotabato nga gikan usab sa Kuwait. Nag-negatibo kini sa swab test didto sa Maynila apan pito (7) ka adlaw lang kini nga na-quarantine didto.
Matud pa ni Dr. Alejandro, ug gikumpirma usab nila Glan Mayor Vivien Yap ug Alabel Mayor Nonoy Salarda, nga wala nay laing ruta giadtuan ang duha sa ilang paghidangat sa Sarangani Province kundili airport ug quarantine area ra. Gikan sa Gensan Airport sakay sa municipal rescue vehicle, diritso na sila sa quarantine room sa ilang barangay.
Nanghinaot na lamang si Dr. Alejandro nga mas pahugtan pa sa nasyonal nga panggamhanan ang striktong pagpatuman sa mga quarantine protocol.
Samtang, nangayo usab kini og pagsabot sa mga katawhan nga ampuan ug dasigon ang mga nag-positibo aron paspas ang ilang pag-ayo, lakip na ang padayong pagpangga sa mga health frontliner. Lisod matud pa ang ilang sitwasyon sa gawas sa Sarangani maong namauli kini sa ilang hometown.
Padayong nagpalagsik ang duha karon sa Sarangani COVID isolation center. Regular silang mupailalum sa mga rapid ug swab test. Para dili unya maparehas atong setenta (70) anyos taga-Maitum nga unang gideklara nga nag-positibo apan sa mga nisunod nga upat (4) ka test ang nag-negatibo kini.
Bantayanan sa gihapon sa mga katawhan ang pipila ka mga lugar sa Pilipinas tungod kritikal ug nagpadayon pa sa ila ang local transmission sa Coronavirus. Niaging gabii, gideklara mismo ni Pangulong Rodrigo Duterte nga mabalik sa labing strikto nga community quarantine nga mao ang ECQ kon Enhanced Community Quarantine ang Cebu City tungod sa labing daghan ang natakdan,samtang ang Talisay City sa probinsya sa Cebu ang anaa sa Modified ECQ. Ang Metro Manila ug ang Davao City ug Zamboanga City sa Mindanao ang anaa sa GCQ o General Community Quarantine.
Sa mga health standard sa Sarangani Province, ang kamanduan ni Governor Steve Chiongbian Solon mao ang stay at home sa gihapon, magpundo sa balay kung dili importante ang lakaw. Anaa naka-sampong pirme sa ilong ug baba ang face mask, pagpanghinlo usab sa kamot, physical distancing dos metros (2m) sa katapad, maligo kung dugay nibabad sa gawas sa panimalay, ug maglikay sa tapok-tapok sa tao. Sa pagsuporta kana nila Vice Governor Elmer De Peralta, tanang board member, mga mayores, nila Senador Manny ug Congressman Ruel Pacquiao ug sa mga municipal health officer-municipal chief of hospital.