El dos camino que ya mejora el Departamento de Obras Publicas y Carreteras (DPWH) ta facilita ahora el mejor viaje del mga motorista para anda na mga destinacion de turismo y centro de comercio na mga municipio del Buug y Payao na provincia del Zamboanga Sibugay.
Si Enginiera Cayamombao Dia, el director regional del DPWH, ya habla del Martes cay el cementada del 406 metro lineal camino na Buug ta ase de fronto el viaje dese’l carretera nacional para andada na destinacion de turismo como el Cueva de Muyo y busay.
Mientras tanto, asegun con Dia el mga siembrador de goma y mga industria del carbon ta beneficia ahora con el nuevo cementao 271 metro lineal camino que ta conecta con Barangay Silal na municipio de Payao para na carretera provincial y nacional que ta reduci el hora del viaje y gastos na transportacion.
“El nuevo mejorao camino ay ase mas bueno con el crecimiento socioeconomic del provincia siendo el mga vivientes facil ya transporta de ila productos agricultural na mga grande mercado y mga visita tiene ya ahora mas segurao y mas conviniente pasada para na mga sercanos municipio,” asegun con Dia.
El mejorada del camino ya implementa el oficina de enginieria del primer distrito del DPWH na Zamboanga Sibugay na cantidad de P4.8 millon cada un proyecto. (B. Garcia, photo courtesy of DPWH-9)