Cebu City- Pormal nang gisang-at sa Regional Anti-cybercrime Unit kun RACU-7 atubangan sa piskaliya gahapon sa hapon ang kasong kriminal batok niadtong optometrist nga nag-post og sayop nga impormasyon o fake news sa social media bahin sa coronavirus.
Kini ang gipahibawo sa pangu sa RACU 7, Col. Marlo Castillo, sa mga tigbalita.
Matod ni Castillo, ila nang gikeha si Dr. Josephil Brian Consuelo nga mulupyo sa Barangay Lahug, Cebu City nga usa ka mananambal sa mata sa ospital nga nagbasi sa Mandaue City.
Kasong kalapasan sa article 154 o unlawful means of publication ug unlawful utterances sa revised penal code ug sa section 6 sa Republic Act 10175 kun anti-cybercrime law ang mga sumbong nga gisang-at batok kang Consuelo.
Hinuon, sumala pa ni Castillo, aduna pay himoong preliminary investigation sa kaso aron mahatagan og higayon ang akusado pagkonsulta sa iyang abogado.
Sa sayo pa, nahinabi sa RACU-7 ang mananambal human sa giingong pag-post niini sa social media og dili maong balita bahin sa langyawng pasyente nga matod pa, usa ka patient under investigation kun PUI sa coronavirus nga namatay sud sa University of Cebu Medical Center kun UCMed sa Mandaue.
Apan pagka Peb. 13 miluwat og statement ang tagdumala sa UCMed nga nanghimakak sa post ni Consuelo nga nag-viral.