CAGAYAN DE ORO CITY- Naglisod karon pagtumbok ang Regional Task Force sa Covid-19 ug ang Department of Health-Northern Mindanao kon asa nakuha sa duha ka pasyente ang coronavirus disease dinhi sa Cagayan de Oro. Mao kini ang gisugilon ni Dr. Adriano Suba-an, chairman sa maong taskforce ug regional director sa DOH-10 diin ang unang pasyente nga taga Pinikitan, Camaman-an ang namatay ug ang ika-duha mao ang 21 anyos nga taga Lumbia ning syudad.
Matud ni Dr. Subaan, lisod pa kaayo tumbukan alang kanila kon asa nakuha sa maong mga Covid-19 patients ang maong virus. Sa usa ka press conference sa cityhall, gisugilon ni Subaan nga ilang gitun-an sa pagkakaron ang transmission nga nakatakboy sa duruha.
Pipila ka mga dapit nga ilang gitumbok mao ang mga sarang tapukanan sa katawhan sama sa merkado, sabungan, dormitoryo, prisohan ug uban pa.
Maoy hinungdan nga sa pagkakaron, nagpadayon ang pagkuha sa mga testing sa nahimong close contact sa duha ka nagnegatibo ilabi na niining pagbaton sa rehiyon sa duha ka testing laboratories.