Gipahibalo sa Traffic Management Office (TMO) sa siyudad kaniadtong Nobyembre 10, 2025, ang bag-ong re-routings sa trapiko tungod sa bag-ong pagsirado sa Quezon Bridge, aron masiguro ang hapsay ug luwas nga daloy sa mga sakyanan.
Sumala sa TMO, ang tanang sakyanan nga 450 kgs paubos gikan sa northern part sa siyudad sama sa Sicayab, Larayan, ug Dapitan kinahanglan moagi sa Barra Circumferential Bridge, pasulod sa sentro sa dalan Lacaya Street (One-way) gikan alas 6:30 hangtud alas 9:00 sa buntag ug alas 4:00 hangtud alas 6:30 sa hapon.
Samtang ang mga sakyanan nga mogawas sa siyudad padulong sa maong direksyon gi-awhag nga moagi sa Osmeña Street ug moliko sa wala padulong sa tulay tapad sa Corazon Aquino Hospital. Ang mga sakyanan nga 451 kgs pataas, lakip ang cargo, fishcar, ug passenger buses, gi-awhag nga moagi sa Minaog-Dicayas-Turno Bypass Road.
Alang sa mga ginikanan nga maghatud sa ilang anak sa ZNNHS Turno Campus, pwede silang moagi sa Bypass Road ug moliko sa tuo pasulod sa eskwelahan, ug mogawas sa Upper Turno Highway, diin ang dalan padulong sa ZNNHS gihimong One-Way gikan alas 6:30–9:00 sa buntag ug alas 4:00–6:30 sa hapon.
Gipangayo sa TMO ang pagsabot sa publiko ug gi-assure nga ipasusi ang mga rota ug butangan ug tukmang signages alang sa kasayuran sa tanang motorista.(IKEN B. GULLEM)
Source: Dipolog City Government