Gipailalom sa ocular inspection ang Siocon District Hospital sa Barangay Poblacion niadtong Septyembre 10 aron masuta ang kahimtang sa pasilidad ug matino ang gikinahanglang major repairs human sa mga katuigan nga kulang sa rehabilitation.
Gisusi sa Provincial Government ang kasamtangang kahimtang sa ospital aron mahibal-an ang tibuok sakop sa trabaho ug pondo nga gikinahanglan alang sa pag-ayo niini. Anaa na ang inisyal nga ₱15 milyon nga gigahin alang sa unang hugna sa repairs.
Samtang, nangita si Governor Darel Dexter T. Uy og dugang nga pondo aron suportahan ang rehabilitation ug mabalik ang ospital sa full operation. Tumong niini nga mahatagan ang mga residente sa Siocon og healthcare facility nga mas duol ug mas dali nilang ma-access.
Gilauman nga pinaagi sa padayong pag-ayo ug pagpalig-on sa pasilidad, mahimong magamit pag-usab ang Siocon District Hospital sa pagserbisyo sa mga residente ug makatabang sa pagpakunhod sa panginahanglan sa pagbiyahe og layo alang sa medical care.(JENIFFER JR. DELICA)
Source: Provincial Government of Zamboanga del Norte