Dul-an sa 1,000 ka tropa sa security forces ang ipa-deploy alang na sa hapsay, malinawun ug malampuson nga Barangay and Sangguniang Kabataan Elections (BSKE) 2023.
Sa usa ka Joint Send-Off Ceremony nga gipahigayon sa 97th Infantry Battalion Headquarters, Del Pilar, Piñan, Zamboanga del Norte, ang peace keepers gilangkuban sa mga element sa Philippine National Police, Philippine Army, Philippine Coast Guard ug Bureau of Fire Protection nga magbantay sa pagahimoong Barangay and Sangguniang Kabataan Elections karong Oktubre 30.
Si LTC Nolasco Coderos, Jr., ang Commanding Officer sa 97th IB nagpahinumdum sa security forces sa gabayan nga angay nilang sundon diha sa pagpatuman sa ilang gimbuhaton alang sa maong piniliay.
Kini gilangkuban sa dili pagsul-ob sa military o service uniform sa mga tawong dili direktang nalambigit sa election duty; dili pagdawat ug unsa mang butang gikan sa kinsa mang kandidato; sigurohon ang gawasnong paglihok sa mga botante padulong ug gikan sa ilang presinto; higpit nga pagpatuman sa Kontra-Bigay; pagdakop sa kinsa mang sibilyan nagsul-ob ug uniporme sa military; likayan ang pag-like o share sa bisan asang media platform nga padulong sa pagdapig sa Partido-politikal; kanunayng magbinantayon sa tanang panahon; sundon ang tanang rules ug protocols nga gitudlo kanila atol sa gipahigayong Election Duty Refresher Training ug pagtaho sa unsa mang paglapas o unsa mang election-related incidents para sa hinanaling aksyon.
Sa mga reservists, hingpit nga gidili ang pagsulb-0b ug military uniform panahon sa election period ug likayan ang mass movement.
Gipahinumdoman usab ang mga CAAs ug CAA 1 nga dili linawas nga mag-duty sa barangay diin dunay kabanay nga nanglansar; pagdeposito sa ilang armas sa armory sa ilang tagsa-tagsa ka mga base; dili pagsul-ob ug uniporme, tanang higayon panahon sa eleksyon; ug kon wala makadetail sa polling places, mag-alert kanunay sa ilang tagsa-tagsa ka mga base.
Samtang alang sa mga SCAAs o CAA II, magpabilin sa barracks ug gamiton lamang kon mahitabo ang extreme natural ug man made disaster; ideposito ang tanang armas sa ilang tagsa-tagsa ka armory.
Kinahanglan nga ang SCAA Cadres mosumiti ug Completeness Report ngadto sa NCO-in-Charge sa Operation Center sa Delta Company ug pagtaho sa di ma-account nga mga SCAAs para sa tukmang report ug dugang imbestigasyon ug pagrekomendar alang sa terminasyon niini sa serbisyo kon gikinahanglan.
Sa mubo nga pagkasulti, matud pa ni Lt. Col. Coderos, atong sigurohon nga katuhoan, matinud-anon, hapsay, malinawon ug gawasnon ang BSKE 2023 alang sa mas malambuong Zamboanga del Norte ug malambuong Pilipinas, sa kinatibuk-an.
Si Regional Executive Director Atty. Wilfred Jay Balisado sa COMELEC-9, kini ang namahayag nga garbo niini ang gihimo sa security forces alang sa BSKE 2023.
Giawhag niya ang maong tropa nga himuon nila ang unsa ang maayo ug insakto alang sa kalampusan sa maong piniliay.
Samtang si Provincial Election Supervisor Atty. Jossil Macute sa Zamboanga del Norte, ang nagkanayon usab nga kinahanglan magmalig-on ug patas alang sa BSKE 2023.
Dugang ni Atty Macute nga kinahanglan pasensyoso ug sagupon ang maximum tolerance alang sa hapsay ug malinawun nga piniliay.
Nasayran nga gihingusgan karon sa COMELEC nga walay mahitabong “failure of election”, ug ang yawe niini mao ang suporta ug seguridad sa maong security forces.
Tagsa-tagsang mipabati sa ilang commitment of support ug pakighiusa alang sa usa ka malinawon ug hapsay nga BSKE 2023 sila si LTJG Magno VI sa PCG; FSupt. Elias Baguio, ZNPPO Provincial Director PCol. Glenn Dulawan. (PIC-ATRuda, photo courtesy by Raymond James Garrovillo)
(Source: Provincial Government of Zamboanga del Norte Facebook page)