Usa ka Multi-Sectoral Dialogue ang gipahigayon, diin usa kini ka kabahin sa “Talakayan sa Batayang Sektor” nga gisalmotan ni Sen. Risa Hontiveros, nga gipahigayon didto sa D’Foodhub and Event Center ning dakbayan sa Dipolog, niadtong Oktubre 14,2024.
Tumong sa maong kalihokan mao ang pagpakigkita sa senador sa nagka daiyang sektor ning dakbayan sa Dipolog ilabi na sa mga kababayen-an isip siya ang naila nga Senate Chairman sa Committee on Women, Children Family Relations and Gender Equality mga Fisherfolks, Senior Citizens, Farmers , Youth ug sa Media niining syudad diin ang hilisgotanan niini mao ang kaayuhan sa sektor pinaagi sa pakig dayalogo, pagpasabot ug pagtubag sa pipila ka mga pangutana nga maghatag ug katin-awan ngadto sa sektor nga gisakopan.
Pipila sa mga nitambong mao ang mga inila nga mga opisyales sa gobyerno ning dakbayan sa Dipolog nga gilangkuban nila ni Dipolog City Mayor Darel Dexter T. Uy, kanhi Gobernador Roberto Y. Uy, kanhi Dipolog City Mayor Evelyn Y. Uy ug ni Ms. Ariene Labadlabad.
Ang mga dinapit nga mga sektor ug mga katawhan ning dakbayan sa Dipolog kinsa nisalmot sa kalihokan,nipakita sa ilang hugot nga suporta sa malampusong programa. (Medalyn U. Borja)
Source: Dipolog City Government