Malipayon nga gipadayag ni Maria Luzvilla Laput, usa ka benepisyaryo sa repormang agraryo o Agrarian Reform Beneficiary (ARB), ang iyang gibati tungod sa nasinating bag-ong paglaum human niyang madawat ang iyang titulo ug mga suportang pang-agraryo atol sa Regionwide Consultation with Stakeholders ug Project Support to Parcelization of Lands for Individual Titling o Project SPLIT e-Title ARBs sa Pagadian City.
Miingon si Maria nga dili masukod ang iyang kalipay ug pasalamat sa pagdawat sa titulo ug sa uban pang benepisyo nga gihatag aron mapaayo ang pagdumala sa yuta nga ilang nadawat diin iyang gituohan nga kini usa ka dakong tabang alang sa ilang panginabuhian ug kaugmaon.
Nagpasalamat usab ang maong residente gikan sa Godod Zamboanga del Norte sa tanan nga ahensya ug indibidwal nga mitabang sa paghatod sa maong serbisyo, ug naglaum siya nga ang titulo maghatag og lig-on nga pundasyon alang sa padayon nga paglambo sa ilang komunidad.(JENIFFER JR. DELICA)
Source: DAR Region IX