Hapsay nga napresentar atol sa Province-Wide Health Systems Program Implementation Review ang mga datos kabahin sa mga sakit nga natala sa probinsya, lakip ang mga lakang sa pagpalambo sa serbisyong panglawas sa katawhan.
Ang panagtigum gihimo sa Pavilion Hall, Mibang Hotel karung adlawa, Setyembre 22, 2026, sa Barangay Sta. Filomena Dipolog City ug gitambongan kini sa 25 ka mga munisipalidad og duha ka syudad sa probinsya.
Nakasentro sa maong panagtigom ang pag-assess ug pagreview sa mga niaging tuig nga performances, numero sa mga kakulangon sa supplies, ug mga pamaagi arun mas mapalig-on ang paghatag og medikal nga serbisyo sa isig munisipalidad sa probinsya sa Zamboanga del Norte.
Sa iyang presentasyon, gihisgutan ni Dr. Benson Panaguiton, ang mga health facility og workforce profile sa matag Rural Health Unit sa Lungsod kung asa gipakita sa mga datos ang matag accomplishment ug mga problema nga giatubang sa usa ka LGU.
Matud pa ni Dr. Panaguiton, dapat dili lang ang RHU sa usa ka lungsod ang planohan, kundi lakip usab ang mga District hospitals ingon man ang mga LGU-owned hospitals ang angay tutokan.
Gipakita usab niya sa iyang presentasyon ang top 10 nga mga sakit nga gidala-dala sa mga tawo sa probinsya nga gipangunahan sa Acute Upper Respiratory Infections.
Samtang ang nanguna nga balatian nga mikutlo og pipila ka kinabuhi karung tuiga mao ang Acute Myocardial Infarction o cardiovascular condition.
Sa laing bahin, Gipadayag ni Dr. Panaguiton iyang kalipay sa pag-os-os sa natala nga breast cancer screening karung tuiga. Apan ang HIV screening padayun ra gihapong mitaas. Nagpadayun usab ang Provincial Health Office sa pag alokar og budget para sa tukmang medikasyon sa mental health problems.
Gilauman nga pinaagi sa gihimong forum, mas masabtan sa mga lider sa matag munisipyo ang importansya sa tagsa-tagsa ka Rural Health Unit sa lungsod ug hinaot nga makadawat kini sa angay nga suportang kailangan.(JENIFFER JR. DELICA)