Subsob nga mipahigayon og evacuation ug rescue operations ang mga personahe sa City Disaster Risk Reduction and Management Office (CDRRMO) sa dakbayan sa Dipolog ubos sa pagpangulo ni CDRRM Officer Atty. Arvin Bonbon ngadto sa mga residente sa nagkalain-laing barangay nga naapektohan sa mga pagbaha nga hatod sa makusog nga ulan nga mibundak dinhi nga parte sa nasud sa milabay nga pipila ka mga adlaw gumikan sa Low Pressure Area nga nasinati.
Sa pasi-unang report nga nahitala sa nasangpit nga buhatan, aduna’y 260 ka mga indibidwal ang malampusong napahimutang sa evacuation center sa Barangay San Jose,  85 sa Barangay Punta,  644 sa Barangay Turno,  48 sa Barangay Olingan,  430 sa Barangay Gulayon.
Kahinumduman nga una nang gideklarar ni Acting City Mayor Senen O. Angeles kagabii, Enero 11, 2023 ang pagsuspenso sa klase sa mga magtutungha sa tanang lebel ug usab sa trabaho diha sa mga nasudnon ug lokal nga buhatan sa gobyerno sulod sa dakbayan sa Dipolog sa tibuok adlaw, Enero 12 ug 13 2023, aron malikayan ang dugang peligro ngadto sa mga residente hatod sa dili maayong dagan sa panahon.
Gibisita usab ni Acting City Mayor Angeles ang Listo Center diin nahimutang ang buhatan sa City Disaster Risk Reduction and Management aron sa pagsuta sa kahimtang sa operasyon niini ug pagsiguro nga kahatagan kini sa igong suporta sa ilang operasyon.
Ang buhatan sa City Social Welfare and Development and mihatag usab ug mga pagkaon alang sa mga naapektohan sa maong baha  lakip na ang CMO Nutrition Division nga nanghatag usab og mga champorado alang sa mga kabataan niini.
(Source: Dipolog City Government Facebook page)