Mihimo sa panagtigum ang mga nagkalain-laing “Response Clusters” nga gilangkoban sa mga nasudnon ug lokal nga mga buhatan ning siyudad, pinaagi sa pagpanguna sa buhatan sa City Disaster Risk Reduction and Management (CDRRMO) kagahapong buntag, Nobyembre 3, ning tuiga, didto sa 2nd floor, Museo Dipolog, ning siyudad.
Ang maong tigum ang tuyong gihimo, isip pagpangandam alang sa pagpahigayon sa “Regional Ceremonial Pressing of the Button” alang sa “4th Quarter Nationwide Simultaneous Earthquake Drill (NSED)” karong umaabot Nobyembre 9, 2023 sa may alas 9:00 ang takna sa buntag didto sa Alberto Q. Ubay Memorial Agro-Tech Science High School (AQUMATHHS), sa Barangay Olingan, ning atong siyudad.
Atol sa maong tigum, gituki ang mga nagkalain-laing kaakohan sa mga response clusters dinha unya sa ipahigayon niini nga Simulation Exercise, dinha sa pag-responde atol sa katalagman nga mohapak dinhi sa atong dakbayan.
Kahibaloan nga kining maong “4th Quarter Nationwide Simultaneous Earthquake Drill (NSED) maoy usa ka programa sa atong nasudnong kagamhanan, isip pag-andam sa atong mga katawhan batok sa katalagman, nga mandatong ipahigayon sa tanang mga kagamhanang lokal sa matag quarter.
Kining maong kalihokan ang mga tambongan sa mga bisita gikan sa rehiyonal nga buhatan sa Office of the Civil Defense, isip mga evaluators ning maong Simulation Exercise.
(Source: Dipolog City Government Facebook page)