“Angayan suportahan ang kapolisan aron mamintenar ang kahapsay ug kalinaw dinhi sa probinsya”. Kini ang pamahayag ni Provincial Administrator Wilberth “Gaw Jojo” Magallanes human siya nakadawat ug pasindungog ug ang probinsya sa Zamboanga del Norte sa pagpangulo ni Governor Rosalina “Nanay Nene” Jalosjos” gikan sa Zamboanga del Norte Police Provincial Office (ZNPPO) atul sa 29th Police Community Relations Culminating Activity, Hulyo 31 nga gipahigayon sa Camp Hamac, Sicayab ning dakbayan sa Dipolog.
Dugang ni Provincial Administrator Magallanes nga kung walay suporta ngadto sa kapolisan apektado ang peace and order sa probinsya sanglit dili sila kalihok sa pag-mintinar niini.
Gipasalamatan ni Magallanes si PCol. Rainier Diaz, ang Provincial Director sa ZNPPO sa pag-rekognisar kaniya ingon man sa kagamhanang probinsyal. Samtang si PCol. Diaz mipaabot usab sa iyang dakong pagpasalamat ngadto sa tanang stakeholders sa ilang hugtanong suporta sa kapolisan ilabi na ni Governor Jalosjos, Provincial Administrator Magallanes, Mayor Seth Frederick “Bullet” Jalosjos, Mr. Francis Elveen Palma, tag-iya sa Viewpoint nga anaa nahimutang sa Barangay Tinindugan, lungsod sa Sergio Osmena ug uban pa.
Nasayran nga nahimong pinasidunggang mamumulong mao si Atty. Sherry C. Recososa, Chairperson of Regional Appellate Board (RAB) National Police Commission IX kinsa mipahalipay sa men and women sa ZNPPO sa malampusong pagpahigayon sa kalihukan sa PCR Month sa aron hingpit nga mapaduol ang kapolisan sa komunidad. Gipasalamatan usab niya ang tanang stakeholders nga walay puas sa pagsuporta ngadto sa kapolisan. Ang pagsaulog sa PCR Month niining tuiga nagdala sa tema nga “Ligtas ka sa Bagong Pilipinas”.(Angelica T. Obina)
(Source: PIC-Sheng Jumalon Bala)