Mipaabot sa iyang pagpasalamat si Incoming Governor Darel Dexter Uy sa Zamboanga del Norte ngadto ni Outgoing Governor Rosalina “Nanay Nene” Jalosjos sa usa ka termino nga pagdumala sa probinsya ug sa tiunay nga pagkooperar sa transition team aron maseguro ang hapsay nga pagturn-over.
Kini ang tipik sa mensahe ni Incoming Governor Uy atol sa Turnover Ceremony kaniadtong Hunyo 28, Sabado, sulod sa Plenary Hall, Zamboanga del Norte Convention and Exhibtion Center, ning dakbayan sa Dipolog.
Gipasalamatan usab ni Incoming Governor Uy ang Department of the Interior and Local Government (DILG) pinaagi ni Provincial Director Oliver Ombos sa pagpasiugda sa maong turnover ceremony.
Dugang ni Incoming Governor Uy nga sa pagsugod niining maong bag-ong yugto sa probinsya, iyang gihangyo ang pagsabot ug kooperasyon sa mga hepe sa buhatan sa probinsya.
Siya namahayag nga kung tiunay ug hapsay nga magtinabangay, epektibong maserbisyohan ang katawhan sa Zamboanga del Norte.
Niini, buot ni Incoming Governor Uy nga dungan nga sagupon ang mga hagit sa unahan ug pagpangita ug kusog sa panaghiusa uban sa iyang panultihon nga “Kuyog Ta” nga tinud-anay alang sa kaayuhan sa probinsya sa Zamboanga del Norte.
Samtang sa mensahe usab ni Outgoing Governor Jalosjos, kini ang nagpasalamat sa Kahitas-an nga nakaserbisyo siya sa katawhan sa probinsya sulod sa tulo ka tuig.
Gipasalamatan usab niya ang katawhan sa pagsalig kaniya nakahatag siya sa tinuod nga serbisyo ngadto kanila.
Gikalipay ni Outgoing Governor Jalosjos ang pagtugyan sa kagamhanang probinsyal ngadto ni Governor Uy tungod kay siya nagtuo nga sa liderato niini, ang probinsya makasinati sa ka-abunda, hapsay, malinawun ug adunay malungtaron nga kalambuan.
“Kita magkahiusa ug ihatag nato ang atong kinatibuk-ang suporta ngadto ni Governor Uy.” panapos ni Outgoing Governor Jalosjos.
Si Provincial Planning and Development Coordinator Ms. Augee Lopez-Velasco ang mipresentar sa mga dokumento nga gi-require sa maong turnover pinasikad sa DILG Memorandum Circular Number 2025-033 ug sa pag-establisar usab sa Local Governance Transition Team (LGTT).
Human niini, gisubay ang mga dokumento sa Local Governance Transition Team ni Governor Uy.
Ang maong kalihukan gitambungan kini sa mga hepe sa buhatan sa kagamhanang probinsyal, isip miyembro sa LGTT, Vice Governor Julius Napigquit, Dipolog City Vice Mayor Senen Angeles, Sangguniang Panlalawigan Members Atty. Peter Co, Dante Bagarinao ug IPMR Represnetative Hadiya Caril ug mga hepe sa buhatan sa kagamhanang lokal sa Dipolog ug miyembro sa LGTT. (Angelica T. Obina)
SOURCE: Zamboanga del Norte Prov. Information Center(PIC )- Sheng Jumalon Bala