Napahimuslan na sa tanang 13 ka mga barangay sa La Libertad, Zamboanga del Norte ang Gugma-Ayuda ni Nanay Nene Outreach Program.
Kini human gihugupan sa mga residente sa siyam ka mga barangay sa maong lungsod ang Gugma-Ayuda ni Nanay Nene Outreach Program nga gipahigayon kagahapon, Agosto 8, 2023 sulod sa Municipal Gymnasium nga nahimutang sa Barangay Poblacion, La Libertad, Zamboanga del Norte.
Ang siyam ka mga barangay mao ang barangay Sta. Cruz, La Victoria, San Jose, New Bataan, El Paraiso, Singaran, Mercedes, New Carcar ug New Argao.
Nagpahigayon usab ug anti-rabies vaccination sa mga iro ug iring ang mga personahe sa PROVET, ingon man nanghatag usab sila ug libreng purga ug bitamina sa mga binuhing manok ug baboy.
Dugang pa niini, libreng alot usab ang gilugway sa mga personahe sa PDRRMO sa mga residente sa siyam ka mga barangay sa La Libertad.
Samtang nagpadayon ang maong kalihokan, libreng champurrado ug ice candy usab ang natilawan sa tanan.
Labaw sa tanan, 2,000 usab ka mga residente sa nasangpit nga mga barangay ang nakadawat ug tag-singko kilong bugas gikan sa Provincial Social Welfare and Development Office (PSWDO) nga gipanguluhan ni Provincial Social Welfare and Development Officer, Dr. Jose “Pepe” Mante ug Assistant Provincial Social Welfare and Development Officer, Mr. Alex Sabal.
Si Atty. Ivan Patrick Ang, Spokesperson ni Gov. Jalosjos ang namahayag nga sunod sunod karong mga bulana ang maong program tungod kay daghan gayud nga mga katawhan ang nagkinahalan ug ayuda sa tanang mga munisipyo.
Ang Gugma-Ayuda ni Nanay Nene Outreach Program, gihimo sa administrasyon aron ipabati sa tanang Zanortehanon ang gugma sa usa ka inahan sa lalawigan subay sa iyang panultihon,” Misyon ko, Tinuod nga Serbisyo.”
(Source: Provincial Information Center ZaNorte Facebook Page)