Isip kabahin sa kampanya sa pagpanalipod sa kadagatan ug pangisdaan, gipagawas sa lokal nga panggamhanan sa Dapitan ang duha ka inahan nga alimango nga adunay itlog ngadto sa Dapitan City River niadtong Abril 22, 2026.
Gipangunahan ni Mayor Evelyn T. Uy uban sa mga opisyal sa City Agriculture Office ug Philippine Coast Guard Sub-Station Dapitan ang maong kalihokan, nga nagtumong sa pagpreserbar sa natural nga siklo sa pagpangitlog sa alimango.
Sumala sa City Agriculture Office, ang pagbalik sa “berried crabs” sa suba nagtugot kanila nga mopadayon sa ilang natural nga pagbiyahe padulong sa dagat, diin sila mangitlog, usa ka importante nga proseso aron mapadayon ang suplay sa alimango sa kadagatan.
Gipasiugda sa mga opisyal nga ang pagdakop sa mga alimango nga nagdala og itlog maoy usa sa mga hinungdan sa pagkunhod sa populasyon niini, maong gipadayon ang kampanya aron maprotektahan ang mga spawning crabs.
Kini nga inisyatiba gipaluyohan sa City Council Resolution No. 2013-157-A, nga nagdeklarar sa alimango isip simbolikong produkto sa Dapitan.(IKEN B. GULLEM)
Source: City Government of Dapitan