Si Dawo Punong-Barangay Sushmita Jalosjos sa Dakbayan sa Dapitan na ang bag-ong Presidente sa Liga ng mga Barangay sa Zamboanga del Norte.
Kini human nga migawas siyang mananaog sa gipahigayong eleksyon kaganihang buntag nga gisalmutan sa 24 ka mga Association of Barangay Captains (ABC) Presidents sa Zamboanga del Norte. Bugtong ang lungsod lang sa Roxas, Manukan ig Sindangan ang walay representante sa nasangpit nga piniliay nga gipahigayon sa plenary hall sa Zamboanga del Norte Convention and Exhibition Center nga nahimutang sa barangay Estaka ning Dakbayan sa Dipolog.
Si Dawo-Dapitan City Punong Barangay Sushmita Jalosjos milansar nga walay kaatbang, sama nila ni Hon. Anne Gallo, kinsa napiling Vice President ug Hon. Rhodelito Suello, nga napiling Auditor parehong nakakuha ug 24 botos.
Samtang ang 8 napiling membro sa Board of Directors mao sila si (1)Leopoldo Atad, (2) Lolita Dagomo, (3) Bill Eguia, (4)Â Khan Mohammad Esmali, (5) Ignacio Galan, (6) Aljohn Garzon, (7) Judy Tamparong ug Roger Sevilla.
Si Zamboanga del Norte Department of the Interior and Local Government Provincial Director Mr. Oliver Ombos nga gi-imbitahan ni Board Member Rogelio Isip nga nag-awhag sa mga bag-ong napiling opisyales nga ipadayon ang ilang matinud-anong pagserbe sa ilang mga kaigsoonan ug padayong makigtinabangay sa DILG diha sa ilang pagpangatungdanan.
Alayon niini, gipasalamatan ni Hon. Jalosjos ang tanang misuporta kaniya sukad sa iyang pagkapiling ABC President sa Dakbayan sa Dapitan hangtud na sa iyang pagkapiling Presidente sa Liga ng mga Barangay sa lalawigan sa Zamboanga del Norte.
Sa samang higayon, iya usab nga gipasalamatan ang pagkahiusa sa tanang mga kapitan sa ubang mga kalungsuran ning lalawigan nga misuporta kaniya aron mahimong Liga ng mga Barangay President sa Zamboanga del Norte. (PIC-ATRuda, photo courtesy by Raymond Garrovillo)
(Source: Provincial Government of Zamboanga del Norte Facebook page)
