Napili isip Sangguniang Kabataan Federation President sa Zamboanga del Norte si Leander James Dangcalan, 21 anyos, taga dakbayan sa Dapitan, atul sa 2023 Panlalawigan Pederasyon Election ng mga Sangguniang Kabataan sa probinsya kinsa nakakuha sa 15 botos batok kang Kristine Irish May Cuenca sa dakbayan sa Dipolog kinsa nakakuha sa 12 botos.
Ang maong piniliay gihimo Lunes, Nobyembre 20 nga gipahigayon sa Plenary Hall, ZN Convention and Exhibition Center, ning dakbayan sa Dipolog.
Kini gipasiugdahan sa probinsyal nga buhatan sa Department of the Interior and Local Government (DILG) ug probinsyal nga buhatan sa Commission on Elections (COMELEC).
Ang maong pinilay kumpleto kining gitambungan sa SK Federation Presidents sa duha ka dakbayan sa Dipolog ug Dapitan ug 25 ka lungsod ning probinsya. Nagpasalamat siya sa iyang mga kauban nga SK Federation Presidents sa mga lungsod nga misalig kaniya aron maoy modumala sa probinsya.
Atul unya sa iyang paglingkod sa Sangguniang Panlalawigan, lakip nga tutukan ni Dangcalan mao ang kalabot sa edukasyon aron motungha sa tulunghaan pagbalik ang mga out of school youths. Ingon man dili lamang kutob sa sports activities, kondili lakip usab niyang tutukan mao ang natad sa turismo.
Buot usab ipaabot unya ni Dangcalan ang mga programa sa Sangguniang Kabataan ngadto sa tersero distrito sanglit sa iyang na-obserbahan kuli maabot ang mga programa ngadto kanila.
Si Dangcalan usa ka 4th year college ug nagtungha sa Andres Bonifacio College sa kurso nga Bachelor of Arts in Political Science.
(Source: Provincial Government of Zamboanga del Norte Facebook page)
