Dipolog: Bag-ong provincial administrator nag-aghat sa tanang hepe sa buhatan sa kapitolyo nga magtinabangay alang sa kalamboan sa Administrasyong Jalosjos

0
42

Giaghat ni Provincial Administrator Aurelio Monteclaro nga magtinabangay aron makab-ot ang tumong ni Governor Rosalina “Nanay Nene” Jalosjos nga mapalambo ang tanang mga tambalanan palibot ning lalawigan ilabina sa mga district hospitals.

Kini ang mensahe ni Provincial Administrator Tata Monteclaro atol sa flag raising ceremony, Lunes Abril 3 ning tuiga sa Capitol Grounds, Estaka dakbayan sa Dipolog.

Si Monteclaro opisyal nga milingkod isip ZaNorte Provincial Administrator kaniadtong Marso 23 hulip ni Atty. Dug Christoper “Popoy” Mah nga mi-resign sa iyang katungdanan.

Gibutyag sa bag-ong administrador sa probinsya nga buot ni Governor Jalosjos nga ang Liloy ug Sindangan District Hospitals inanay na nga lihukon sa pagka-level 1 aron makahatag ug maayong serbisyo sa katawhan.

Sanglit, adunay pipila ka mga ambulansya ang nadisgrasya tungod sa pagtamod sa ilang mga pasyente gikan sa halayo nga mga dapit padulong dinhi sa dakbayan sa Dipolog o Dapitan.

Tinguha ni Nanay Nene nga makumpleto ang mga pasilidad ug medical staff ang mga district hospitals, aron dili na ibyahe ang mga pasyente dinhi sa dakbayan o dili risgo sa mga paryente niini kon anaa ra sa duol ang tambalanan.

Gikahibaloan nga numero uno sa talamdan sa pangagamhanan ni Nanay Nene ang health program diin lakip na niini mapalambo ang mga district hospitals sama sa Liloy, Sindangan, Siocon, Labason, Manukan ug Pinan.

Usab, tumong sa gobernadora nga mahatagan sa libre nga hospitalisasyon ang mga indigents o ang labaw nga nanginahanglan ning lalawigan sa Zamboanga del Norte.

Lakbit saysay usab ni Monteclaro nga dili himuong babag nga walay mga ekwipo ang probinsya karon, tungod sa nahitabong mass donation sa nakalabay nga administrasyon.

Hinuon, himuon kining hagit sa tanan ilabina na sa Provincial Engineering Office (PEO) pinanguluhan ni OIC-Engr. Rey Eguia nga mamahimo ra gihapon ang infrastructure projects kon adunay pagtinabangay.

Nanghinaot usab ang bag-ong gitudlo nga administrador sa probinsya nga mapadali ang suhulan sa mga empleyado, particular na ang mga job orders sa kapitolyo aron ang tanan magmalipayon.

Gidasig ni Provincial Administrator Tata Monteclaro ang mga hepe sa buhatan sa kapitolyo lakip na ang mga ginsakpan nga magtinabangay ug mohatag sa maayong serbisyo sa tanan alang sa pagsuporta sa administrasyong Jalosjos lakip na ang tingusbawan sa mga ZaNortehanons.

(Source: Provincial Information Center ZaNorte Facebook page)

Leave a Reply