Sa usa ka high-level nga koordinasyon nga miting nga gipangulohan sa Provincial Environment and Natural Resources Office (PENRO) niadtong Abril 8, gipunting sa Zamboanga del Norte ang kawayan isip pangunang depensa batok sa nagkakusog nga hulga sa climate change ug kalamidad, pinaagi sa pagpasundayag sa “Project Transform with Bamboo Initiative.”
Gisaysay sa mga opisyales nga ang kawayan mahimong “living infrastructure” nga natural nga mopugong sa baha ug soil erosion, ilabi na sa mga lugar nga daling maapektuhan sa grabeng panahon. Labaw pa niini, naghatag usab kini og dugang oportunidad sa panginabuhian alang sa lokal nga komunidad.
Target ipatuman ang proyekto sa mga lungsod sa Sindangan, Leon B. Postigo, ug Gutalac, diin gilauman nga makahatag kini og dugayng proteksyon samtang nagpalig-on sa kahimtang sa kinaiyahan.
Kini nga inisyatiba kabahin sa CLIMATE CARE Program nga gipundohan sa European Union, nga nagtutok sa sustainable ug long-term nga solusyon imbes nga temporaryong pamaagi sa pag-atubang sa kalamidad.
Sa laing bahin, mitambong sa maong miting ang nagkalain-laing ahensya sa probinsya lakip ang PPDO, PDRRMO, ug PEMO, nga naghisgot sa pag-integrate sa proyekto ngadto sa kasamtangang development ug disaster risk reduction plans.(IKEN B. GULLEM)
Source: Zamboanga del Norte Provincial News Network