Nakadawat ug livelihood assistance kits ang upat ka Persons Deprived of Liberty (PDLs) sa Bureau of Jail Management and Penology-Dipolog City Jail – Male Dormitory (BJMP) gikan sa Department of Labor and Employment (DOLE) ubos sa DOLE Integrated Livelihood and Emergency Employment Program (DILEEP).
Ang distribusyon gipangulohan ni JCINSP Manuel U. Calibo, City Jail Warden, uban nila JSINSP Jonathan Arawangsa ug JSINSP Romeo Banas Jr., kauban ang mga personahe sa Provincial Jail Administration ug Development Officers nga mitabang sa pagdumala sa kalihukan.
Matud ni Ms. Nathalie Abeno, Labor Department Officer sa DOLE, ang programa nagtumong sa paghatag ug kahanas ug panginabuhi aron matabangan ang mga PDLs nga makab-ot ang rehabilitation ug reintegration sa katilingban.
Ang maong nakadawat sila Arthur Patagoc, nga nakaangkon ug hairdressing, si Melan Lumanta, nga nakadawat ug Shielded Metal Arc Welding (SMAW), samtang si Jaymark Bendijo nakadawat usab ug Hilot Wellness Massage, ug si Eric Jade Macsog, nakaangkon ug Baking and Pastry Production.
Gawas sa individual kits, ang upat ka benepisyaryo napilian usab nga makadawat ug kumpletong materyales ug kagamitan aron makapahimutang ug gamay’ng negosyo sulod sa pasilidad.
Ang maong inisyatiba nagtinguha nga mapalapdan ang oportunidad sa panginabuhi sa mga PDLs, pinaagi sa paghatag kanila ug praktikal nga kahanas ug kahimanan nga makatabang sa ilang rehabilitasyon ug pagbalik sa katilingban.(Iken B. Gullem)
Source: Bjmp Dipolog CityJail MaleDormitory