Kapin sa usa ka libo ka mga benepisyaryo gikan sa nagkalain-laing sektor sa komunidad sa Siocon ang nakadawat og bugas isip kabahin sa Local Government Support Fund–Financial Assistance to Local Government Units (LGSF-FALGU) Rice Distribution Project.
Gipahigayon ang pag-apod-apod sa bugas sa Office of the Provincial Engineer (OPE) Sub-Office Siocon, District III-C, Barangay San Francisco, diin mikabat sa 1,110 ka benepisyaryo ang nakadawat sa ilang alokasyon.
Lakip sa mga benepisyaryo ang mga senior citizen, persons with disabilities (PWDs), solo parents, mag-uuma, mangingisda, ug ubang low-wage earners nga kwalipikado sa maong programa.
Alang sa duha ka cycle nga naglangkob sa mga bulan sa Hulyo ug Agosto, mikabat sa 2,220 ka sako sa bugas ang gipagawas ug gipang-apod-apod ngadto sa mga kwalipikadong benepisyaryo. Ang maong tabang gitumong aron makatabang sa ilang inadlaw nga panginahanglanon sa pagkaon.
Mitambong ug mipakita sa iyang suporta sa maong kalihokan si Siocon Municipal Vice Mayor Marlyn Duhaylungsod, uban sa mga kawani gikan sa Office of the Provincial Social Welfare and Development Officer (OPSWDO), mga personnel gikan sa Opisina sa Bise Mayor, Provincial Job Order personnel, ug si Hendjie Biri, Third District Provincial Coordinator.
Nagsugod ang kalihokan alas 8:00 sa buntag ug natapos alas 5:00 sa hapon. Hapsay nga napahigayon ang pag-apod-apod sa bugas ngadto sa mga benepisyaryo nga gikan sa nagkalain-laing barangay sa lungsod.
Ang maong programa kabahin sa padayon nga paningkamot sa lokal ug probinsyal nga pangagamhanan sa paghatag og tabang sa mga sektor nga labing nanginahanglan, ilabina sa pagpalig-on sa food security ug kaayohan sa mga pamilyang nanginahanglan og suporta.(IKEN B. GULLEM)
Source: Zamboanga del Norte Provincial News Network