Kontento si City Director Elmer Penolio kan DILG sa halangkaw na gradong nakua kan Iriga sa natatapos pa sanang evaluation kan nagtalikod na lunes sa pinag-implementar na road clearing sa enterong nasyon.
Ini an reaksyon kan opisyal matapos na makua kan cuidad an 99.37% na mas halangkaw sa ibang mga cuidad sa enterong kabikolan.
Sigun sa saiya, ini nangyari huli sa kooperasyon kan gabos na barangay asin pusog na paninindugan kan mga opisyal orog na an 36 na barangay sa cuidad.
Tinaw’an nin duon kan opisyal na an kaipuhan sana ngunian iyo na masusteniran an pagigin obstruction free kan lambang tinampo sa cuidad nin Iriga na publiko man sana an makikinabang.
Mientras tanto, mayoriya kan mga banwaan sa Rinconada area an nakakua nin halangkaw na marka sa nagtalikod pa sanang evaluation sa road clearing.
Ini man an nakuang informacion kan Radio Ronda hali sa opisina kan DILG, kun sain almost perfect an mga nakuang score.
Sigun sa source kan Radyo Ronda, anas laog sa 90% an nakuang score kan anom na banwaan, pagpapahiling sana na anas nagkaigua nin effort tanganing sunudon an directiba ni Pres. Rodrigo Duterte na mabawi an lugar pampubliko hali sa pribadong gamit.
(Source: DILG Office, Iriga City)