Mobarog na unya ang duha ka edipisyo nga gipanag-iyahan sa siyudad sa Dipolog human pormal nga gipahigayon ang Groundbreaking Ceremonies sa D’Food Park dinha sa Boulevard ug sa bag-ong Sangguniang Panlungsod (SP) Building karong adlawa, Oktubre 16 ning tuiga.
Unang napahigayon ang groundbreaking sa D’Food Park sa may kapin kon kulang 8:30 ang takna sa buntag diin kini gitambongan ni Mayor Darel Dexter T. Uy uban sa mga miyembro sa konseho ning dakbayan sa pagpangulo ni Bise-Mayor Atty. Senen O. Angeles, mga hepe ug personahe sa mga buhatan sa kagamahanang lokal, mga Punong Barangay lakip na ang pipila ka mga vendors ning siyudad.
Ang D’Food Park, dunay project cost nga kapin 33 milyones ka pesos, tukoron sa siyudad aron mahatagan og hapsay, konbenyente ug limpiyong lugar ang mga vendors dinha sa ilang pagpamaligya.
“D’Food Park is a testament to our commitment to upgrading the services and facilities of our city government for our citizens and tourists alike”, tipik sa pamahayag ni Mayor Uy.
Ang 1-storey building dunay floor area nga mokapin sa 2,200 sq.m, gidesinyo alang sa open dining aron matagamtam sa mga dumudu-ong ang ka-presko sa hangin sa dagat.
Human niini, gisunod dayon ang groundbreaking sa bag-ong SP Building nga nahimutang sa susamang luna nga gibarogan niini og dunay pundo nga Php105M. Kini usa ka neoclassical architecture inspired – 4-storey building nga dunay gilapdon nga 19.90m ug dunay floor area nga 1,043.64sq.m.
Nasayran nga ang P105M nga pundo nagagikan sa panudlanan nila ni Sen. Aquilino Pimentel III (Php50M), Sen. Sherwin T. Gatchalian (Php20M), Sen. Juan Miguel F. Zubiri (Php20M) ug Sen. Edgardo “Sonny” Angara (Php15M).
Gihimo usab sa nasangpit nga duha ka kalihukan ang ceremonial lowering of time capsule lakip na ang pag-blessing niin nga gipahigayon ni Vice Chancellor Avelino Ansog Jr., sa Diocese of Dipolog.
(Source: Dipolog City Government Facebook page)
