Cebu City – Nagkinahanglan og mga contract tracers ang Department of Interior and Local Government o DILG-VII aron mapalambo ang contact tracing efforts nga gihulagwayng mas epektibong paagi pagsanta sa pagkatap sa coronavirus disease.
Ang pangu sa Local Government Monitoring & Evaluation Division sa DILG VII, Atty. Ian Kenneth Lucero, mipasabot nga ang pag-hire og dugang contact tracers moseguro sa haom ug tukma nga pagpahigayon sa contact tracing ug pagreport sa surveillance data sa COVID-19.
Matod ni Lucero, ang mga aplikante kinahanglang nagbaton og bachelor’s degree nga mosibo sa trabaho, preferably allied Medical Course or Criminology.
Kinahanglan usab nga adunay kasinatian sa data gathering ug nakasuway na pag-abag sa research and documentation; makahimo pag-interview sa mga pasyente sa COVID-19 ug sa mga close contacts aron paghipos og data labot sa travel history ug paghimog health assessments; kinahanglang adunay katakos pag-advocate og public health education messages; ug adunay investigative capability.
Ang mga interesadong aplikante mo-submit lang og Letter of Intent, Personal Data Sheet, National Bureau of Investigation o NBI Clearance, ug drug test result unya i-e-mail lang sa DILG Provincial Office.
(Jhon Tadlip/JTY)
(Source: Department of Interior and Local Government VII)