Nahimong bisita nan Sangguniang Panlalawigan sa ila ika-52 na Regular Session kahapon, Hulyo 6, 2020 sila si Superintendent Karen Galanida nan Surigao City Schools Division sanan Superintendent Ma. Teresa Real nan Surigao del Norte Schools Division, nga naimbitahan sa session para sa paghatag nan dugang katin-awan, pahibayo kabahin sa kinatibuk-an na sirkumstansiya kabahin sa pag eskwela sa SY 2020-2021, nunot nan inin panahon sa pandemya sa corona virus 2019.
Sa nahibaw-an, tungod sa pandemya jaoy mga kabag-uhan sa sektor nan edukasyon sa tibuok nasud partikular sa sistema na gamiton pagtudlo sa mga estudyante, na tungod sa sitwasyon jaon nay kalainan sa mga naandan na pamaagi. Una na dinhi an paggamit nan internet connections, hinungdan na tagka imbitahan sad an mga nag-una na establismento nga naghatag nan internet services pareho nan Smart, Globe, sanan PLDT, pero waya ini manunga.
Sa ija presentasyon, tagsulti ni Supt. Galanida nan City Division na padajon pa kuman an enrollment hangtud petsa kinse sa ini na buyan nan Hulyo 2020, na sa pagkakuman jaon pay 11,000 ka mga bata an nakapa enroll o 33% pa sa naandan na mga manunghaay sa ciudad.
Tagpaqhibayo isab ni Dr. Galanida na sa survey ngadto sa mga ginikanan nogawas na an pamaagi na tagtawag na BLENDED LEARNING MODALITY an nag una na pamaagi na tagpili para gamiton sa pagtudlo; nagsunod an Modular Distance Learning; Face to Face o an tradisyunal na paagi; On Line Distance Learning na matud pa popular sa urban areas pero waya sa mga rural areas o sa mga hilit na lugar; Instructional Facilitation; sanan an TV/Radio Instruction. (Jhino Parrucho, Ronda 10 RPN DXKS)
Link: https://www.facebook.com/RPNSurigao/videos/278645313246546/