Gibutyag mismo ni Doctor Myer Mula, ang national program director sa SAAD kon Special Area for Agricultural Development, nga nakadayig matud pa si Department of Agriculture Secretary William Dar sa malampuson ug produktibo nga pagpatuman sa SAAD program sa entiro probinsya sa Sarangani, hinungdan nga mudungag og minilyon na usab nga pondo ang Department of Agriculture aron magpadayon ang SAAD program sa Sarangani bisan matapos pa ang termino ni Pangulong Rodrigo Duterte sa tuig 2022, dakong pabor kini sa mga yanong mag-uuma hilabi na ang mga kaigsoonang lumad sa kabukiran sa Sarangani Province.
Si SAAD National Program Director Dr. Mula ang nahimong dinapit nga bisita sa bag-uhay lang natigayon nga “SAAD Saga 2019” nga gi-organisa sa opisina ni DA 12 Regional Director Milagros Casis.
Matud pa sa maong opisyal, na-“amaze” matud pa si Secretary Dar sa gipatuman nga SAAD upland rice and livelihood development program sa pamunuan ni Sarangani Governor Steve Chiongbian Solon nagsugod sa panahon ni kanhing Agriculture secretary Manny Piñol. Ang maong kalihukan matud pa ang nagpasiguro nga adunay siguradong makaon ang mga gagmay nga mag-uuma sa ilang kan-anan kon “food on the table” ug aduna pay dungag panginabuhian.
Malipayon nga gibalita ni Governor Solon sa mao nga SAAD Saga 2019 nga sa panalangin sa Ginoo tungod na usab ga-tithes ang mga mag-uuma samtang naga-share sa mga silingan, gadaghan ang mga na-harvest nga upland rice, OPV o open-pollinated variety white corn ug mga gulayon gilangkuban na karon sa saysentay-singko (65) kabuok beneficiary upland barangay sa tibuok Sarangani, sa pagsuporta nila Senador Manny ug Congressman Ruel Pacquiao, Vice Governor Elmer De Peralta, mga board member ug mga mayores.
Gibida usab kini sa Gobernador sa bag-uhay lang nahitabo nga labing una 1st SOCCSKSARGEN Food Basket and Agri-Competitiveness Summit nga gi-organisa sa Philippine Chamber of Commerce and Industry kon PCCI sa pagpanguna ni Mr. Raymond Salangsang, ang nangulo sa PCCI Southwestern Mindanao, ug sa Department of Agriculture.
Segun ni Governor Solon isip sya pud ang vice chairman sa Region 12 Area Development Project Board ang chairman mao ang secretary sa Department of Agriculture, walay rason matud pa nga dili mahimong food and rice production basket ang Sarangani, Region 12 ug ang Mindanao kung masuportahan sa Department of Agriculture ug sa pribadong sektor ang pagpananum og upland rice. “Drought-resistant” matud pa ang upland rice maong makalahutay kini bisan sa kainit sa panahon. Pwede matud pa nga kita na ang mu-suplay og bugas sa merkado, dili na mu-import pag daghan sa ubang mga nasud, tagaan lang og subsidiya sa gobyerno aron dili mahal paliton, nutritious pa tungod kay organic rice.
(Photos: SAAD Sarangani, Jake Narte)