Nakatakdang ipatawag ni General Santos City SP-Committee on Finance chairperson, Atty. Franklin Gacal, Jr. ang Local-IATF ug mga representante sa Office of the City Mayor aron masayran ang katikaran sa Covid-19 vaccination rollout sa siyudad.
Kini human gipaabot sa opisyal ang impormasyon nga posibleng madelatar ang pagdawat sa siyudad sa alokasyon niini alang sa Russian-made Sputnik V vaccine, gumikan sa walay igong cold-chain facilities ang dakbayan.
Gikahibulong ni Gacal ang maong katikaran, luyo sa naaprubahan na sa SP ang ₱ 30-million supplemental fund alang sa maong katuyuan niadtu pang bulan sa Pebrero.
“When we approved that, wa pa man gani nagsugod ang pagpanghatag og bakuna sa mga LGUs. Gihangyo nato na nga i-prepare na kay dili nako gusto nga ma-repiter ang sitwasyon katong nagpalit kita og laboratory nga niabot og pila ka bulan. I think, the same mistake is happening,” ang tipik sa pamahayag sa konsehal.
Sa gitunol nga impormasyon, nasayran nga aduna nay nakatagana unta nga alokasyon sa maong bakuna ang national government alang sa siyudad ug uban pang mga lugar sa Mindanao, apan madelatar ang pag-deliver niini gumikan sa kakulangon sa cold-chain facilities.
“Tumawag na sa amin ang DOH na may allocation tayo ng Sputnik ang problema kasi wala tayong (cold-chain) facility na paglalagyan, so baka ma-delay yan,” ang tipik sa pamahayag sa maong source gikan sa City Health Office. (John Rey Somido)